ஒரு மன்னிப்புக் கோரலை எளிதாக்க

உலர்ந்திருக்கும் இந்த விடியலை

நான் யாசிக்கப் போகும் மன்னிப்பின் ஈரத்தால்

நனைத்துக் கொள்ள எண்ணமிட்டிருக்கிறாய்..

எப்படியெல்லாமோ,

எதற்காகவோ, என்னவென்றெல்லாமோ

புரிந்து கொள்ளப்படக்கூடிய

ஒரு மன்னிப்புக்கோரலை விட

எனக்கு

மிகக் கடினமானது வேறொன்றுமில்லை..

காதலைத் தெரிவிப்பது கூட.

ஒரு முத்தத்தில் குளிராமல்

ஒரு பார்வையில் உருகாமல்

ஒரு தலையசைப்பில் கசியாமல்

நிலம் வெறிக்கும் விழிகள் பார்த்து

மன்னிப்புக் கோருவது எப்படி என்று

இன்று வரையில் எனக்குத் தெரிவதேயில்லை.

அவசரமாக மறைக்கப்படும்

ஒரு துளி கண்ணீரையாவது

நிகழ்த்திக் காட்டி

அதை எளிதாக்கலாம் எனக்கு நீ..

..ஷஹி..